काठमाण्डौ समाचारदाता, १७ फागुन – बुटवलको सैनामैनामा फुटबल खेलको प्रवद्र्धन गर्ने उद्देश्यले ‘सुनगाभा सैनामैना गोल्ड कप २०८१’ आयोजना हुने भएको छ। यो प्रतियोगिता फागुन १९ देखि २८ गतेसम्म सैनामैना फुटबल रंगशाला, मुर्गियामा हुनेछ।
मुर्गिया फुटबल क्लबले आयोजना गर्ने यस प्रतियोगिताको मुख्य प्रायोजक सुनगाभा पब्लिक स्कुल रहेको छ। क्लबका अध्यक्ष प्रविन भारीका अनुसार प्रतियोगिताका लागि सबै तयारी पूरा भइसकेको छ। सैनामैना नगरपालिकाले प्रतियोगिताका लागि ५ लाख रुपैयाँ तथा खेलमैदान मर्मत गर्न थप ५ लाख रुपैयाँ सहयोग गरेको छ।
खेल संयोजक अशोक खड्काका अनुसार यो प्रतियोगिता रुपन्देहीमा तिलोत्तमा गोल्डकपपछि सबैभन्दा ठूलो हुने अनुमान गरिएको छ। अखिल नेपाल फुटबल संघ (एन्फा) को स्वीकृतिमा प्राविधिक सहयोग प्राप्त हुने उनले जानकारी दिए।
प्रतियोगिताका विजेताले नगद ७ लाख रुपैयाँ, कप, मेडल र प्रमाणपत्र पाउनेछन् भने उपविजेताले नगद ४ लाख रुपैयाँ, कप, मेडल र प्रमाणपत्र प्राप्त गर्नेछन्। उत्कृष्ट खेलाडीलाई पनि नगद तथा कपबाट पुरस्कृत गरिनेछ। यो प्रतियोगिता सञ्चालन गर्न करिब ६० लाख रुपैयाँ खर्च लाग्ने अनुमान गरिएको छ। खेलाडीहरूको सुरक्षाका लागि १ लाख रुपैयाँसम्मको बीमा गरिएको छ।
प्रत्येक टिममा ५ जना विदेशी खेलाडी खेल्न पाउने व्यवस्था गरिएको छ, जसले नेपाली खेलाडीलाई सिक्ने अवसर प्रदान गर्ने विश्वास गरिएको छ। प्रतियोगितामा ए डिभिजन क्लब, विभागीय टिम तथा एउटा विदेशी टोलीसहित १० टिमले भाग लिनेछन्। उद्घाटन खेल आयोजक मुर्गिया फुटबल क्लब र गोर्खा ब्याईज क्लबबीच हुनेछ।
सैनामैना नगरपालिका वडा नं. ४ का वडाध्यक्ष रामप्रसाद अधिकारीका अनुसार नगरपालिकाले खेलकुद प्रवर्द्धनमा सक्रिय भूमिका खेलेको छ। आठ करोड रुपैयाँ लागतमा निर्माण भइरहेको रंगशालाको करिब ७० प्रतिशत काम पूरा भइसकेको छ। संघ, प्रदेश तथा स्थानीय सरकारको सहयोगमा रंगशाला निर्माण कार्य जारी छ। प्रतियोगिताका लागि विभिन्न दाताहरूबाट करिब ५० लाख रुपैयाँ सहयोग प्राप्त भएको छ।
७० वर्षभन्दा माथिका ज्येष्ठ नागरिक र अपांगता भएका व्यक्तिहरूलाई खेल हेर्न निःशुल्क प्रवेशको व्यवस्था गरिएको छ। दर्शकहरूका लागि १,००० रुपैयाँको सिजन टिकट राखिएको छ, जसबाट ९ दिनसम्म खेल हेर्न सकिन्छ।
