हरिप्रसाद कोइराला ,
बेलबारी(मोरङ)३१ भदौ । मोरङको बेलबारी–९ पोखरियामा दैनिक ९० टन चामल उत्पादन गर्न सक्ने क्षमताको अत्याधुनिक आरजु राईस मिल (चामल उद्योग ) सञ्चालनमा आएको छ ।
नेपालमा उत्पादित धान मात्र प्रयोग गरेर चामल उत्पादन गर्ने लक्ष्य लिएको उद्योगले गत वर्ष ५ सय बिघा खेतको धान खरिद गरी चामल उत्पादन गरेको थियो । खासगरी थोरै क्षेत्रफलमा बढी उत्पादन हुने रामधानको प्रबद्र्धन गर्ने र सोही धानको लङ्ग्रेन चामल उत्पादन गर्ने उदेश्यले चामल मिल सञ्चालनमा ल्याइएको हो । उद्योगका महाप्रबन्धक डा.विवेकानन्द झाले भन्नुभयो– हाल धान अभावमा उत्पादन छैन् । अबको २ वर्षभित्र ३६५ दिन नै चामल उत्पादन गर्ने योजना छ । उहाँका अनुसार उद्योगले स्थानीय र छिमेकी पालिकाका किसानसँग समन्वय गरी चालु आर्थिक वर्षमा २ हजार बिघा खेतमा रामधानको खेती गरेको छ । प्रति विघा १ सय मन धान उत्पादन हुने लक्ष्य छ । यो उत्पादनले पनि वर्षभरि उद्योग सञ्चालन हुँदैन ।
वर्षभरि उद्योग सञ्चालन गर्न ७ हजार बिघाको धान आवश्यक पर्छ । जसका लागि झापा र सुनसरीका किसानसँग सहकार्य भइरहेको छ । महाप्रबन्धक झाले भन्नुभयो – ढुवानीमा कम लागत होस भनेर हामीले बेलबारी,रङ्गेली र कानेपोखरीका किसानलाई उद्योगसँग जोडिरहेका छौं । उद्योग वरिपरिका किसानले हाम्रो माग अनुसार धान उत्पादन गरिदिनु भयो भने ढुवानी खर्च कम हुन्छ र सस्तो मूल्यमा चामल बिक्री गर्न सकिन्छ । जसका लागि तीन पालिका भित्रको १० हजार बिघा जग्गा खोजि भइरहेको छ । एकमुष्ठ जग्गा भेटिने अवस्था छैन् । त्यसैले एक एक गरी किसानलाई जोडिरहेका छौं । किसानलाई आवश्यक पर्ने रामधानको गुणस्तरीय बिउ,बैंकसँग कर्जा लिन र बाली बीमाका लागि सहजीकरण,काट्ने प्रविधिमा सहयोग र ढुवानीका लागि ट्याक्टरको ब्यवस्थामा उद्योगले सहयोग गर्नेछ ।
५० करोड रुपियाँ लगानी भइसकेको उद्योगमा हाल ६० जनाले रोजगार पाएका छन् । आगामी कात्तिकसम्ममा १० करोड रुपियाँ लगानी थपिने र पूर्ण रुपमा उद्योग सञ्चालनमा आउँदा ८० जनाले रोजगार पाउने महाप्रबन्धक झाको भनाई छ । पूर्ण रुपमा उद्योग सञ्चालन गर्न स्वदेशी धानको उत्पादन बढाउनु पर्ने भएकोले प्रविधिमा समेत उद्योगले किसानलाई सहयोग गरिरहेको छ । ३६५ दिन नै रामधानको चामल उत्पादन हुन थालेपछि मात्र मन्सुली, बासमती लगायतका धानको चामल उत्पादन गर्ने महाप्रबन्धक झाले बताउनु भयो । किसानसँग सहकार्य गरी एकसय बिघामा बासमती धान रोपेका छौं, त्यसबाट कस्तो नतिजा आउँछ । त्यसपछि मसिनो धानको उत्पादनमा लाग्ने योजना छ । उद्योग पूर्ण रुपमा सञ्चालन हुन २० हजार टन धान आवश्यक पर्छ ।
