अग्निपथ समाचारदाता,
माेरङ,२० असोज ।कुनै बेला पानीले भरिभराउ भलुवा सिमसार यतिबेला जलकुम्भीले भरिएको छ । सामूदायिक वनको आन्तरिक बिबादले भलुवा सिमसारको सौन्दर्यकरण सम्बन्धी काम ४ वर्ष देखि अलपत्र परेपछि सिमसार क्षेत्र जलकुम्भीले भरिएको हो ।
मोरङको कानेपोखरी–७ स्थित भलुवा सिमसारको सौन्दर्यकरण गर्न गाउँपालिकाका तत्कालिन अध्यक्ष ताराबहादुर काफ्लेले ६ वर्ष अघि शिलान्यास गर्नु भएको थियो । त्यसपछि सुरु भएको काम सव डिभिजन बन कार्यालयले रोकि दिएपछि सौन्दर्यकरणको काम अलपत्र परेको हो । निर्माण कम्पनीले काम गरिरहेको बेला सव डिभिजन वन कार्यालय कानेपोखरीले बन क्षेत्रमा काम गर्ने अनुमति मागेको थियो । सामूदायिक वन क्षेत्रमा काम गर्न सामूदायिक बनले डिभिजन बनसँग कार्ययोजना स्वीकृत गराउनु पर्ने कानूनी ब्यवस्था रहेको छ ।
ग्रामीण सुधार सामूदायिक बनको संरक्षण क्षेत्र भित्र रहेको सिमसार क्षेत्रमा सौन्दर्य भर्न यस अघि पनि लाखौं रुपियाँ खर्च भइसकेको थियो । सामूदायिक बनले लामो समय सम्म साधारणसभा गर्न नसकेको कारण नयाँ कार्ययोजना निर्माण हुन सकेको छैन् । डिभिजन बन कार्यालय मोरङका सुचना अधिकारी रामलखन ठाकुरले भन्नुभयो – सामूदायिक बनको आन्तरिक बिबादले नयाँ कार्ययोजना बन्न सकेको छैन । पुरानो कार्ययोजनाको अवधि समाप्त भएकोले कार्ययोजना पास नभई काम गर्न नदिइएको ठाकुरको भनाई छ ।
भलुवा सिमसारलाई पुर्बकै नमुना पर्यटकीय क्षेत्र बनाउन सौन्दर्यकरण सुरु गरिएको १० वर्ष भन्दा बढी भइसक्यो । तर, सरकारी निकाय र सामूदायिक बन बीच समन्वय नहुँदा करोडौं रुपियाँ सिमसारमा गाडिए पनि काम सम्पन्न भएको छैन् । कानेपोखरी गाउँपालिकाले तत्कालिन अध्यक्ष ताराबहादुर काफ्लेको पालामा ४ लाख ५० हजार रुपियाँ खर्चेर डिपीआर तयार गरिएको थियो । डिपीआरमा वन्यजन्तु संरक्षण गर्न सानो चिडियाखाना , ट्रि हाउस , वनभोज खाने कटेज , स्वागत गेट , कल्भर्ट , विश्रामलय , पाले बस्ने ठाउँ, शौचालय , पोखरीको बीचमा पुल , सभाहल र पाहुना बस्ने घर सहितका संरचना निर्माण गरिने उल्लेख थियो । जसका लागि तत्कालिन पर्यटन मन्त्री भानुभक्त ढकालले बजेट समेत बिनियोजन गरिदिनु भएको थियो । ५ करोड रुपियाँको लागत अनुमान तयार भएको उक्त आयोजनाका लागि पर्यटन मन्त्रालयले ३ करोड ५० लाख र गाउँपालिकाले डेढ करोड रुपियाँ खर्चिने सहमति भएको तत्कालिन अध्यक्ष ताराबहादुर काफ्लेले बताउनु भयो । तर ,योजनाको ठेक्का ३ करोड ६५ लाख ९८ हजार ८७० रुपियाँमा स्काई सएस मुटुयल जेबिले प्राप्त ग¥यो ।
ठेकेदार कम्पनीले २ बर्ष भित्र काम सम्पन्न गरी स्थानीय सरकारलाई जिम्मा लगाउने सहमति भएको थियो । तर, ४ वर्ष बितिसक्दा पनि काम सम्पन्न भएको छैन् । कानेपोखरी गाउँपालिकाकी अध्यक्ष राजमती इङ्नामले सिमसार वनक्षेत्र भित्र पर्ने भएकाले हाललाई काम रोकिएको बताउनु भयो । वनले कार्ययोजना पास गरेपछि काम सुरु हुने अध्यक्ष इङ्नामको भनाइ छ । पुर्ब पश्चिम राजमार्गको कानेपोखरी चोक देखि करिब तीन किलोमिटर दक्षिणमा रहेको सिमसार तथा जलाधार क्षेत्र १४ हेक्टर जमीनमा फैलिएको छ । २०६९/७० सालमा सामूदायिक वनका तत्कालिन अध्यक्ष हरिप्रसाद पौडेलले भलुवा सिमसार संरक्षण समिति गठन गरी सौन्दर्यकरणको काम सुरु गर्नु भएको थियो । त्यस बेला पनि सौन्दर्यकरणका लागि ८ लाख रुपियाँ खर्च भएको पूर्व अध्यक्ष नवीन राईले बताउनु भयो । राईले आफू अध्यक्ष हुँदा समेत अढाई लाख रुपियाँ खर्च गरेको बताउनु भयो । ८१५ हेक्टरमा फैलिएको तराईको सबैभन्दा ठूलो सामूदायिक बन ग्रामीण सुधार सामुदायिक वन उपभोक्ता समूहको आन्तरिक विबाद समाधानको अन्तिम चरणमा छ ।
सामूदायिक बन तीन टुक्रामा विभाजित गरी दुई वटा सामूदायिक बनको साधारणसभा सम्पन्न भइसकेको छ । नयाँ अध्यक्ष देवेन्द्र थापाले भन्नुभयो – हाम्रो कार्ययोजना अन्तिम चरणमा पुगेको छ । बनले स्वीकृति गर्नासाथ काम अघि बढ्छ ,थापाले भन्नुभयो ।
