रतुवामाई,२६ असोज । दक्षिणी मोरङको रतुवामाई नगरपालिकाको प्रमुख प्रशासनिक भवन अझै भाडा कै घरमा बसिरहेको छ ।
मोरङमा १ महानगरपालिका ,८ नगरपालिका र ८ गाउँपालिका रहेछन् । जसमध्ये अझै भाडा कै घरमा बसिरहेको नगरपालिका रतुवामाई मात्रै हो । नगरपालिकाले मासिक १ लाख ३५ हजार रुपियाँ घरभाडा मात्र तिरिरहेको छ । नगरपालिकाका प्रशासन प्रमुख नरहरि निरौलाका अनुसार एउटै घरमा कोठा नपुगेर स्वास्थ्य शाखा,रोजगार सेवा केन्द्र उद्यम विकास शाखा,शिक्षा,युवा तथा खेलकुद,कृषि एवम् महिला बालबालिका शाखा अलग अलग घरमा भाडामा राखिएको छ ।
साविकका महादेवा,झुर्किया,सिंजुवा, इटहरा गाविस पुरै र बरडङ्गा,गोविन्दपुर गाविसका ४/४ वडा मिलेर बनेको रतुवामाई नगरपालिका जिल्लाको दक्षिण पूर्वमा पर्ने नगरपालिका हो । सुरुका ३ वर्ष सम्म जग्गा प्राप्तिमा अल्मलिएको नगरपालिकाले २०७७ मा जग्गा प्राप्त गरी भवन निर्माणको प्रक्रिया सुरु गरेको थियो । हाल भाडामा रहेको भवनबाट पश्चिम दक्षिणमा जग्गा ब्यवस्थापन गरी २०७८ भदौ २८ गते नगरपालिकाले भवन निर्माणको सम्झौता गरेकोथियो ।
भूमि वीसीपीए जेभीले भ्याट सहित ९ करोड ४१ लाख ६४ हजार १७४ रुपियाँमा भवन निर्माण गरी २०८१ को भदौ २५ गते निर्माण सम्पन्न गर्नु पर्ने थियो ।
१६ करोडको लागत इष्टमेट थियो । घटाघटमा ९ करोडमा निर्माण हुने गरी ठेक्का सम्झौता भयो । तर, ठेकदारले बीच मै काम छोडेर हिडेपछि यतिबेला नगरपालिकाको टाउको दुखाई सुरु भएको छ । ४ महिना देखि ठेकदार बेपत्ता छन् । जिन्सी शाखा प्रमुख महेन्द्र ठाकुरले भन्नुभयो–सम्पर्क गरिरहेका छौं । काम गर्छौं, भन्छन् तर काम गर्न आउँदैनन् । सम्झौता भएको मितिले २ वर्ष भित्र कम्तीमा पनि ८० प्रतिशत काम सम्पन्न हुनु पर्ने हो ।
यता नगरप्रमुख नागेश्वरप्रसाद सिंहले ठेक्का लिने कम्पनीले अर्कै पेटी ठेकदारलाई दिएको र पेटी ठेकदार काम छोडेर भागेकोले काम रोकिएको बताउनु भयो । निर्माण कम्पनीले पुन अर्को पेटी ठेदारलाई काम दिएको थियो । तर, भुक्तान प्रक्रियामा समस्या भएपछि ठेकदार अदालत गई मुद्धामामिलामा लागे । अदालतले काम गर्न दिनु भन्ने फैसला गरेको छ । अब प्रक्रिया पु¥याएर निर्माण कम्पनी काममा फर्किन्छ, उहाँले भन्नुभयो ।
नगरको मात्र होइन, ८ र १० नम्बर वडा कार्यालय पनि अझैसम्म भाडा कै घरमा बसेर सेवा प्रवाह गरिरहेका छन् ।
