मोरङ / गोमा नेपालले नेपाल बचत तथा ऋण केन्द्रीय सहकारी सङ्घ लि. को उपाध्यक्ष पदमा उमेद्वारी घोषणा गर्नु भएको छ । बचत तथा ऋण सहकारी संस्थाको केन्द्रीय छाता संस्था नेपाल बचत तथा ऋण केन्द्रीय सहकारी सङ्घ लि.(नेफ्स्कुन) को ३२ औं वार्षिक साधारणसभा पुसको ७ र ८ गते काठमाडौंको प्रभा प्नतिष्ठान कमलादीमा हुँदैछ ।
३२ औं साधारणसभाले ४ वर्षका लागि नेफ्स्कुनको नयाँ नेतृत्व चयन गर्दैछ । २०५६ सालदेखि सहकारीको सदस्य शेयर सदस्य भएर बचत ऋण सहकारीसँग जोडिनु भएकी नेपाल २०६० बैसाखबाट पथरीशनिश्चरे १ को मनकामना साकोसमा कार्यलय सचिव भएर अभियानसँग जोडिनु भएको हो । खुल्ला प्रतिस्पर्धाबाट सहकारीमा जागिरे जीवन सुरु गर्नु भएकी नेपालले त्यहाँ ३२ महिना काम गर्नुभयो । ३२ महिना सहकारीमा जागिर खाँदा उहाँले सहकारीको ज्ञान,सीप र अनुभव मात्र हासिल गर्नु भएन । छाता संघ तथा नियामक निकायहरुले आयोजना गरेका क्षमता वृद्धिका तालिम गोष्ठी हरूमा सहभागी हुँदै सीप र क्षमता आदान प्रदान गर्ने अवसर पनि पाउनु भयो ।
२०६२ सालमा पूर्वी मोरङको उर्लाबारीमा नेपाल लगायतले एउटा गैर सरकारी संस्थाको स्थापना गर्नुभयो । सोही संस्था मार्फत मोरङको ग्रामीण क्षेत्रका महिला दिदी बहिनीहरूसँग नेपाल पनि जोडिनु भयो । खासगरी ग्रामीण समुदायका महिलालाई आय आर्जन र शशक्तिकरणका काम गर्ने संस्थाको उदेश्य थियो । ग्रामीण भेगमा मात्र होइन, शहरसँग जोडिएका र शहर उन्मुख गाउँहरूमा पनि शशक्तिकरणका कार्यक्रम सञ्चालन गर्नुपर्छ भन्ने मान्यता स्थापित भयो । सोही अनुसार २०६३ सालमा ३९ जना महिला मिलेर मोरङको उर्लाबारीमा एउटा महिलाहरूको मात्र बचत ऋण सहकारी संस्था स्थापना भयो । नारी सङ्कल्प बचत तथा ऋण सहकारी संस्था स्थापना गरेपछि नोपलको सहकारी यात्रा थप उचाईमा पुग्यो । सहकारी स्थापना भएपछि सहकारी,महिला दिदी बहिनी र समुदायसँग सधैं सम्बन्ध झनै बढ्यो ।
त्यहाँ सचिव ,लेखा संयोजक ,उपाध्यक्ष हुँदै हाल अध्यक्षको जिम्मेवारमा रहनु भएकी नोपल भन्नुहुन्छ – ३९ जना महिला बाट शुरु भएको नारी सङ्कल्पमा अहिले ३ हजार २ सय सदस्य आवद्ध हनुहुन्छ ।
२०६६ सालमा जिल्ला बचत तथा ऋण सहकारी सङ्घ मोरङको सञ्चालक सदस्य , उपाध्यक्ष र लेखा सुपरिवेक्षण समितिको संयोजकको भुमिका निर्वाह गरिसक्नु भएकी नेपाल २०७३ सालबाट नेफ्स्कुन सञ्चालकको रुपमा कार्यरत हुनुहुन्छ । प्रारम्भिक सहकारीको ब्यवस्थापक,सहकारीको सञ्चालक, जिल्ला सङ्घ र केन्द्रीयसँग आवद्ध भएर निरन्तर बचत तथा ऋण अभियानमा लाग्ने नोपल एक मात्र महिला हुनुहुन्छ ।
उहाँ भन्नुहुन्छ – सहकारीमा महिला सहभागिताको सहभागिता प्रतिशत ५६ प्रतिशत रहेको छ । राज्यको समतामूलक नीति अनुसार महिलाले मात्र सञ्चालन गरेका ४ हजार बढी सहकारीमा सबै पदहरुमा महिला मात्र छौं तरपनि निर्णायक तहमा सहभागिता न्यून नै रहिआएको छ । बिस्तारै महिला सहभागिताको लागि संबैधानिक ब्यबस्था बमोजिम सहकारीका संघ संस्थाहरुले पनि नीतिगत ब्यबस्था गरेर महिलाको अर्थपूर्ण सहभागिताको लागि पहल गरिरहेको देखिन्छ । यद्यपि अहिले पनि तुलनात्मक रुपमा महिला सहभागिता अत्यन्तै कम छ ।
