उर्लाबारी। सुचना प्रविधिको सहज वहुँच भएपनि त्यसको प्रयोग गर्न नजान्दा धेरै किसानले ठूलो आर्थिक घाटा ब्योहोर्नु परिरहेको छ ।
मोरङको उर्लाबारी–९ का खोजबहादुर निरौलाले युट्युवमा आउने भिडियो हेरै भरमा बाख्रापालन सुरु गर्नुभयो । २०७९ सालमा युट्युवमा बाख्रापालेर लाखौं कमाएको भिडियो हेरेपछि खोजबहादुरको मन थामिएन । त्यसपछि आफूसँग भएको सबै पैसा बाख्रापालनमा लगाउनु भयो । १ लाख ५० हजार रुपियाँ खर्चेर आधुनिक गोठ बनाउनु भयो । जिउँदो बोयर जातका बाख्रा २४ सय रुपियाँ किलो हालेर ल्याउँनु भयो । युट्युवको बाख्रापालन हेरेर उहाँमा बाख्रापालनमा यस्तो भोग जाग्यो कि कतै बाख्रा देख्नै नहुने भयो । सिंगाने राले सबै बाख्रा बटुलेर खोरमा हाल्नुभयो । गाउँ कै सगरमाथा चौकको एउटा बाख्रा गोठ नै उहाँले १ लाख ४० हजारमा उठाइदिनु भयो । झण्डै साडे ५ लाख रुपियाँ खर्च गरिसक्दा उहाँको गोठमा ७५ वटा बाख्रा भइसकेका थिए ।
डेढ बिघा जग्गा मध्ये १० कट्ठामा उहाँले घाँस लगाउनु भयो । गाउँमा कसैले नगरेको काम गर्नु भएका ५३ वर्षीय निरौलालाई गाउँघरको साथ रहेन । धेरैले हाँसी मज्जा गरे । धान फल्ने खेतमा घाँस लगाएर निरौला जेठो बहुलायो सम्म भने । गाउँघरका साथीभाइका कुरा नसुनि खोजबहादुर बाख्रापालनमा लाग्नुभयो । बाख्राको उपचार, दाना सबै जोडजाम गर्नुभयो ।
साडे ३ वर्ष बाख्रा पालेपछि खोजबहादुरलाई युट्युवको भिडियोमा जस्तो सफलता प्राप्त भएन । साडे ३ वर्षमा ५ लाख लगानी भएका बाख्रा २ लाखमा बिक्री भए । उहाँले भन्नुभयो – खेतबारी भरि बाख्रा गाडेको छु । २२ हजारमा किनेको बाख्रो २२ सयमा बिक्री गर्नुप¥यो ।
खेतभरि घाँस थियो । त्यसपछि उहाँले त्यही दुईलाखमा ३ माउ गाई किन्नु भयो । गाई पाल्न थालेको ८ वर्षभयो । गाईको दूध बेचेर बाख्राको घाटा तिरिसकें । खोजबहादुरको गाई गोठमा अहिले सात माउ गाई छन् । दैनिक ३५ लिटर दूध बिक्री गर्नु हुने निरौला गाईपालनबाट भने सन्तुष्ट हुनुहुन्छ । दूध किन्न डेरी उद्योग घरमै आउँछ । उहाँले भन्नुभयो –खर्च कटाएर वार्षिक ४ लाख रुपियाँ आम्दानी हुन्छ । गोबर खेतमा हाल्छु, धान उत्पादन पनि राम्रो भइरहेको छ । बाख्रापालनबाट टाट उल्टेको थिएँ । गाईले बचायो ।
उर्लाबारी नगरपालिकाले निरौलालाई पशुपालनमा नथाकेको किसानको रुपमा गत असारमा सम्मान ग¥यो । नगरको सम्मान पछि निरौला गाईपालनलाई बिस्तार गर्ने सोचमा हुनुहुन्छ ।
