अग्निपथ समाचारदाता
लेटाङ,२५भदौ । उत्तरी मोरङको लेटाङ नगरपालिकाले चुरेमा चिउरी २०८० कार्यक्रम अन्तर्गत २० हजार चिउरीका बिरुवा रोप्ने भएको छ । लेटाङ १ को राजारानी सामूदायिक वन उपभोक्ता समूहको साडे ५ हेक्टर खाली जमीनमा नगरपालिकाले ५ हजार बिरुवा रोपिसकेको छ ।
साउन १ बाट सुरु भएको कार्यक्रम भदौ भित्र सम्पन्न गर्ने लेटाङ नगरपालिकाका प्रमुख भुपेन्द्रकुमार लावतीले बताउनु भयो । लावतीका अनुसार नगरको पूर्व पश्चिम भूगोल भित्र साडे १३ किमी चुरे क्षेत्र पर्छ । मदन भण्डारी राजमार्ग निर्माण भएपछि चुरेमा पहिरोको जोखिम बढेको छ । लेटाङमा पनि मदन भण्डारी राजमार्गको थोरै भाग चुरेमा पर्छ । चुरेमा हुने पहिरोको जोखिम न्युनीकरण गर्न, पानीको स्रोत बचाई राख्न र चिउरीबाट बन्ने आयुर्वेदिक औषधिको कच्चा पदार्थ उत्पादन गर्ने उदेश्यले चुरेमा चिउरी कार्यक्रम ल्याइएको नगर प्रमुख लावतीले बताउनु भयो । वृक्षारोपण कार्यक्रममा नेपाली सेना, सामूदायिक वनका उपभोक्ता र मौरी पालक किसानको उत्साहजनक सहभागिता रहेको थियो । मौरीपालक किसानका लागि चिउरी नामको वनस्पति सबैभन्दा उपयुक्त वनस्पति मानिन्छ । चिउरीको काठबाट बनेको घार र चिउरीको फूलबाट बन्ने मह स्वास्थ्यका लागि राम्रो मानिन्छ ।
नगर प्रमुख लावतीले भन्नुभयो–चिउरी संकटापन्न अवस्थाको वनस्पति हो । जङ्गलमा चिउरी मासिसकेको छ । जङ्गल नै एकांकी भइरहेको छ । जङ्गलमा सबैखाले वनस्पति भए मात्र त्यो जङ्गलले वातावरण सन्तुलनमा राख्न सक्छ । नगरले वृक्षारोपणका लागि १५ लाख रुपियाँ बजेट छुट्याएको छ । एक जना हेरालु राखेर विरुवाको संरक्षण गर्ने र ३ वर्ष भित्र उत्पादन लिने नगरको योजना छ । चिउरीको विजुला प्रसोधन गरेर घ्यू निकाल्न सकिन्छ ।
हाल पहिलो चरणमा राजारानी र लोखरा बीचको खाली जग्गामा ५ हजार बिरुवा रोपिएको छ । थप ५ हजार बिरुवा राजारानी पश्चिम तर्फ रोप्ने कार्यक्रम रहेको छ । नगर प्रमुख भुपेन्द्र कुमार लावतीका अनुसार २० जार बिरुवा रोप्ने योजना थियो । तर, बिरुवा उपलब्ध हुने सकेन ।त्यसैले हाललाई १० हजार बिरुवा रोप्ने कार्यक्रम तय गरेका हौं ।