कानेपोखरी १० असोज । मोरङको रमाइलोका चार वटा संस्थाको संयुक्त आयोजनामा कानेपोखरी महोत्सवको दोस्रो संस्करण आयोजना हुने भएको छ ।
रमाइलो युवा परिवार,कानेपोखरी ब्यापार सङ्घ ,रमाइलो जेसीज र लायन्स क्लव अफ कानेपोखरीले बुधबार रमाइलो बजारमा संयुक्त पत्रकार सम्मेलन आयोजना गरी महोत्सवका विषयमा जानकारी गराएको हो । असोज ११ गते औपचारिक उद्घाटन हुने महोत्सव असोज २४ गतेसम्म सञ्चालन हुनेछ । पत्रकार सम्मेलनमा महोत्सवका बारेमा प्रकाश पार्दै रमाइलो युवा परिवारका अध्यक्ष नवीन पौडेलले पहिलो संस्करणको मेलाबाट प्राप्त उपलब्धिलाई संस्थागत गर्दै दोस्रो संस्करण आयोजना गर्न लागिएको बताउनु भयो । उहाँका अनुसार पहिलो संस्करणबाट प्राप्त आम्दानीले चार वटै संस्थाको सामूहिक भवन बनाउनका लागि जग्गा प्राप्तिको काम सम्पन्न भएको छ । पौडेलले सामूहिक भवन,बाल उद्यान, सामूदायिक हल, कवर्ड हल,नाटक घर लगायतका संरचना निर्माणका लागि आयोजक संस्थाले डिपीआर बनाउने काम सुरु गरेको बताउनु भयो । जग्गा ब्यवस्थापन पछि दोस्रो चरणमा डिपीआरको काम सुरु भएको छ । डिपीआर सम्पन्न भएपछि एउटै जमीनमा विभिन्न संघ,संस्थाका लागि भवन निर्माण गर्ने र त्यहाँबाट सेवा प्रदान गर्ने आयोजक संस्थाको सपना छ । पौडेलले सपना नदेखि योजना सम्पन्न नहुने समेत बताउनु भयो ।
रमाइलो युवा परिवारका अध्यक्ष नवीन पौडेलको सभापतित्वमा भएको पत्रकार सम्मेलनमा कानेपोखरी ब्यापार सङ्घका अध्यक्ष डिल्लीराम फुयल,रमाइलो जेसीजका अध्यक्ष मातृका कोइराला र लायन्स क्लव अफ कानेपोखरीका अध्यक्ष अमरमणि घिमिरेको उपस्थिति थियो ।
सयपत्री इन्टरप्राइजेजले महोत्सवको सम्पूर्ण जिम्मा लिएको छ । आयोजक संस्थाहरूले सयपत्री इन्टरप्राइजेजसँग सम्झौता अनुसारको रकम पाउनेछन् । महोत्सवमा राष्ट्रिय तथा स्थानीय कलाकारहरूले गीत तथा नृत्य प्रस्तुत गर्नेछन् ।