कानेपोखरी,२९ असोज । मोरङको कानेपोखरी–५ स्थित जनजागृति सामूदाययिक बन उपभोक्ता समूहको २२ औं साधारणसभा सोमबार जहदा खेलमैदानमा सम्पन्न भएको छ ।
साधारणसभाको उद्घाटन गर्दै कानेपोखरी गाउँपालिकाकी अध्यक्ष राजमति इङ्नामले सामूदायिक वनले महिला सशक्तिकरणका क्षेत्रमा उल्लेखनीय काम गरेको बताउनु भयो । सामूदायिक बनले गरेका कामको प्रशंसा गर्दै सामूदायिक बनले नयाँ प्रस्तावित योजनामा सडकको सौन्र्दयीकरण गर्ने कार्यक्रम अत्यन्तै राम्रो भएको बताउनु भयो । उहाँले भन्नुभयो–पालिकाले प्राप्त गर्न कर समयमा बुझाए पालिका पनि सहकार्य गरेर अघि बढ्न तयार छ ।
सामूदायिक बन महासंघ कोशी प्रदेशका सचिव रेणुका दाहालले सरकारले सामूदायिक बनलाई निचोरेर कर तिर्न बाध्य बनाइरहेको बताउनु भयो । उहाँले आपुर्ति समितिलाई ५० प्रतिशत काठ दिनु पर्ने ब्यवस्था अबैज्ञानिक भएको बताउँदै वनको गोठालो गर्ने उपभोक्ताले आपुर्ति समितिलाई काठ दिन नसक्ने उल्लेख गर्नुभयो ।
सव डिभिजन बन कार्यालय कानेपोखरीका प्रमुख मो.अल्लाउद्धिनले अब बन विस्तार गर्दा भारतीय विरुवा ल्याएर नरोप्न सुझाव दिनुभयो । यहीका रैथाने विरुवा लगाउन सुझाव दिँदै उहाँले साज,कुसुम,साल,बोडधएँरो जातका बिरुवाले मात्र हाम्रो वातावरण सन्तुलित रहने बताउनु भयो ।
सामूदायिक वनका अध्यक्ष भोजराज श्रेष्ठले गत वर्षको प्रगति प्रतिवेदन र आगामी वर्षको कार्ययोजना पेश गर्नु भएको साधारणसभामा संस्थाका कोषाध्यक्ष इन्द्रकुमारी लिम्बूले गत वर्षका यथार्थ आम्दानी र खर्च तथा आगामी आवको अनुमानित आय ब्यय प्रस्तुत गर्नुभयो ।
कार्यक्रममा जनता आधारभुत विद्यालयका चार जना विद्यार्थीलाई जनही २ हजार ५ सयका दरले छात्रवृति प्रदान गरिएको थियो । छात्रवृति प्राप्त गर्नेमा प्रनुस राई,जयन्ती चेम्जोङ,मनिषा नेपाली र सायद श्रेष्ठ रहनु भएको छ । यस्तै मैनावारी आधारभुत विद्यालयका रिया पौडेल,निखिल राई, मलिका हेमरम र सुरेस हेमरमलाई समेत २ हजार ५ सय नगद छात्रवृति प्रदान गरिएको थियो ।
कार्यक्रममा पालिकाका उपाध्यक्ष भोलाप्रसाद अधिकारी,वडा नं. ५ का वडाध्यक्ष चरण गुरुङ,सामूदायिक महासंघ कोशी प्रदेशका सदस्य अग्नि पौडेल, जिल्ला महासंघका मोरङका कार्यवहाक अध्यक्ष मदन पोख्रेल र कानेपोखरी गाउँपालिका महासंघका अध्यक्ष नवीन राईको समेत उपस्थिति थियो ।
साधारणसभामा लेखा समितिका सदस्य छत्रबहादुर विश्वकर्माले आन्तरिक लेखा प्रतिवेदन र अनुगमन समितिका संयोजक तीर्थबहादुर कार्कीले अनुगमन सम्बन्धी प्रतिवेदन प्रस्तुत गर्नु भएको थियो ।