कानेपोखरी । रिक्त दरबन्दीमा विज्ञापन खुलाएको २ महिना बित्न लाग्दा पनि परीक्षा गराएर नयाँ शिक्षक नियुक्ति नगरेको भन्दै कानेपोखरीका शिक्षक सङ्घ , सङ्गठनले कानेपोखरी गाउँपालिकाको ध्यानाकर्षण गराएका छन् ।
मोरङको कानेपोखरी–४ स्थित मिलन चौकमा रहेको पञ्चकन्या आधारभूत विद्यालयले समयमा शिक्षक नियुक्ति नगर्दा विद्यार्थीको भविष्य समेत बिग्रिएको सङ्घ ,सङ्गठनको ध्यानाकर्षण पत्रमा उल्लेख छ । शिक्षक महासंघ कानेपोखरीका अध्यक्ष धर्मराज थापाले विद्यालय व्यवस्थापन समतिकिा अध्यक्ष रोषन लामछिाने गुरुङ र प्रधानाध्यापक भरत राजवंशीलाई बुधबार अविलम्ब शिक्षक नियुक्ति गर्न माग गर्दै ज्ञापन पत्र बुझाउनु भएको छ ।
हालसम्म गाउँपालिकाको शिक्षा शाखाको स्वार्थका कारण विद्यालयमा शिक्षक नियुक्ति नभएको ज्ञापन पत्रमा उल्लेख छ । ब्यवस्थापन समितिका अध्यक्ष रोसन लामिछाने गुरुङले आगामी सोमबार परीक्षा गर्ने तयारी भइरहेको बताउनु भएको छ ।
ज्ञापन पत्रमा शिक्षक कर्मचारीहरुको पाँच वटा संस्थाले संयुक्तरुमा हस्ताक्षर गरेका छन् । नेपाल शिक्षक महासंघ गाउँ समिति कानेपोखरीका अध्यक्ष धर्मराज थापा, नेपाल राष्ट्रिय शिक्षक संगठन गाउँ समिति कानेपोखरीका अध्यक्ष सञ्जीव खड्का, नेपाल शिक्षक संघ गाउँ समिति कानेपोखरीका अध्यक्ष जंगबहादुर बोहोरा, एकीकृत अखिल नेपाल शिक्षक संगठन कानेपोखरीका अध्यक्ष सुरतलाल चौधरी र नेपाल विद्यालय कर्मचारी परिषद कानेपोखरीका अध्यक्ष जीतमाया भुजेलले ज्ञापन पत्रमा हस्ताक्षर गर्नु भएको छ ।
