मोरङ (याङ्सिला ) । विश्वमा सङ्कटापन्न अवस्थामा रहेको सालक संरक्षणमा महत्वपूर्ण भूमिका निर्वाह गर्ने चार जनालाई शनिबार मोरङको केराबारी–५ सतिसालेमा नगद सहित सम्मान गरिएको छ ।
विश्व सालक दिवस २०२४ को अवसरमा स्थानीय नमूना पर्माकल्चर सिकाई थलो याङ्सिलाले स्वयंसेवक भएर सालक संरक्षणमा खटेका चार जनालाई सम्मान गरेको हो । सम्मानित हुनेमा जलकन्या सामूदायिक बन उपभोक्ता समूहका अध्यक्ष धनबहादुर तामाङ,रवि कट्टेल,समीक्षा राई र टीका भण्डारी हुनुहुन्छ । उहाँहरूलाई कोशी प्रदेश सभा सदस्य खड्गबहादुर बस्नेतले जनही १ हजार ५ सय नगद सहित प्रमाण प्रत्र प्रदान गर्नुभयो । समूदाय स्तरका आधारभूत विद्यालय र सामूदायिक बनहरूमा सालक संरक्षणको आवश्यकता र उपयोगिताका विषयमा स्वयम्सेवकको रुपमा जनचेतना फैलाउन महत्वपूर्ण योगदान गरे वापत उहाँहरूलाई सम्मान गरिएको हो ।
मोरङ उत्तरी चुरे क्षेत्र सालकको बसोवास क्षेत्र मानिन्छ । नेपालमा सन् २०१७ देखि औपचारिक रुपमा विश्व सालक दिबस मनाउन थालिएको हो । सन् २०१३ देखि संसारभर लोपोन्मुख अवस्थामा रहेको सालक संरक्षणका लागि प्रत्येक वर्षको फेब्रुवरीको तेस्रो शनिवारलाई विश्व सालक दिवस मनाउने निर्णय भएपछि नेपालमा पनि यो अभियान सुरु भएको कोशी टप्पु–कन्चनजङ्घा बायोडायभरर्सिटी लाइभलिहुड स्टुडियो (केटिके बेल्ट) का कन्ट्री डाइरेक्टर प्रमोद लिङ्देनले बताउनु भयो । लिङ्देनका अनुसार विश्वमा ३६ प्रजातिका बन्यजन्तु संरक्षणको सूचीमा छन् । जसमध्ये इन्डियन सालक अति सङ्कटापन्न अवस्थामा रहेको छ । यसको संरक्षण नगर्ने हो भने आगामी पुस्ताका लागि इण्डियन सालक डायनोसर जस्तै हुने उहाँले बताउनु भयो । सालक किसानसँग मात्र जोडिएको र पर्यटन उद्योगमा खासै महत्व नराख्ने भएकोले गैरसरकारी संस्था र सरकारी संस्थाले संरक्षणमा खासै चासो नराखेको उहाँको भनाई थियो । सालक संरक्षण अभियान कोशी टप्पु–कन्चनजङ्घा बायोडायभरर्सिटी लाइभलिहुड स्टुडियो (केटिके बेल्ट) को प्राविधिक एवम् आर्थिक सहयोगमा सञ्चालन भइरहेको छ ।
फेवु्रबरी १५ देखि ३ दिन सम्म मनाइएको विश्व सालक दिवसका विभिन्न कार्यक्रममा केरावारीका ७ वटा आधारभुत विद्यालय र २५ वटा सामूदायिक वनको सहभागिता रहेको आयोजक संस्था नमुना पर्माकल्चर सिकाई थलोका अध्यक्ष कुमारबहादुर विश्वकर्माले बताउनु भयो । सो अवसरमा विद्यार्थीका लागि हाजिरीजवाफ , कविता प्रतियोगिता लगायत जनचेतनाका कार्यक्रम आयोजना गरिएको थियो । शनिवार सबै प्रतियोगितामा विजयीहरूलाई कोशी प्रदेश सभा सदस्य खड्गबहादुर बस्नेतले नगद सहित पुरस्कार प्रदान गर्नुभयो ।