मोरङ(कानेपोखरी)। मोरङको कानेपोखरी–३ हरकपुरमा ३५ हजार लेयर्स कुखुराको कृषि फर्म सञ्चालनमा आएको छ ।
७ करोड रुपियाँ लगानी गरी इटहरीका द्रोर्ण घिमिरे र सुन्दरहैँचाका पदम तिम्सिनाले हरकपुर एग्रिकल्चर प्रालि सञ्चालनमा ल्याउनु भएको हो । ३५ हजार मध्ये २३ हजार कुखुराले दैनिक अण्डा दिइरहेका छन् । ३ बिगाहा जग्गामा फैलिएको फर्मले स्थानीय २३ जनालाई प्रत्यक्ष रोजगार दिएको छ । सञ्चालक द्रोण घिमिरेले भन्नुभयो– फर्म सुरु भएको ३ वर्ष भयो । तर, सुरुको वर्ष वर्डफ्लुले चौपट्ट भएको फर्मले गत वर्ष र चालु वर्ष सन्तोषजनक उत्पादन दिइरहेको छ । पहिलो वर्ष १ करोड ३३ लाख रुपियाँ घाटा ब्योहेरेको फर्मले पछिल्ला वर्ष खर्चसम्म ब्यवस्थापन गरिहेको घिमिरेले बताउनु भयो ।
भारतको हरियाण र पञ्जावमा कृषि फर्ममा काम गर्न जाने स्थानीय सन्थाल समूदायका युवा गाउँमै काम पाएपछि खुसी छन् । ३ बिघामा ७ वटा ठूला आधुनिक र सुविधा सम्पन्न खोरमा दुई चरण उत्पादन दिने कुखुरा हालिएको छ । उत्पादन निरन्तर होस भन्ने आसयले २३ हजार १ सयले अण्डा दिन छोडेपछि बाँकी चल्ला बयस्क हुन्छन् र अण्डा दिन सुरु गर्छन। सुरुका ५ महिना दाना मात्र दिउर चल्ला पाल्नु पर्छ । त्यसपछिको २४/२५ महिना लगातार अण्डा उत्पादन दिन्छन । वर्डफ्लु र निमोनिया जस्ता रोगको प्रकोप भएन भने अरु सामान्य रोगको उपचार स्थानीय पशुपंक्षी स्वास्थ्य कार्यकर्ताबाट हुने घिमिरेले बताउनु भयो । कोशी प्रदेशको तेस्रो ठूलो हरकपुर एग्रिकल्चर प्रालिले कुखुरासँगै खसी बाख्राको समेत ब्यावासायिक पालन सुरु गर्ने तयारी थालेको छ ।
दुई खालका कृषि उद्योग भए एउटाबाट घाटा भएपनि अर्कोबाट नाफा गर्न सकिने भएकोले पशुपालन तर्फ पनि लाग्ने तयारी थालेको सञ्चालक द्रोण घिमिरेले बताउनु भयो ।
फर्मबाट निस्कने सुलीले कृषि उ्रत्पादन समेत बढाउने गरेको छ । खासगरी व्यावसायिक तरकारी खेती गर्ने किसानले प्रति बोरो ३ सय रुपियाँले सुली खरिद गरिरहेको घिमिरेको भनाई छ । औषतमा प्रत्येक साता ३ सय बोरा सुली निस्कने गर्छ । ठूलो कृषि फर्म भएपनि अहिले सम्म सरकारी अनुदान तर्फ नलागेको घिमिरेले बताउनु भयो ।
कोशी प्रदेशको अण्डाको माग पुरा गर्ने गरी उत्पादनको तयारीमा छौं । हालसम्म बजारको अभाव छैन् । कोशी प्रदेशका तराईका सबै जिल्ला र इलाम, पाँचथर,धनकुटा , तेह्रथुम र उदयपुरसम्म उत्पादन पुगिरहेको उहाँको भनाई छ ।