उर्लाबारी । कोशी प्रदेशका मुख्यमन्त्री हिक्मतकुमार कार्कीले जेष्ठ नागरिकहरू नै समाजका तीर्थस्थल भएको बताउनु भएको छ । उहाँले हरेक दिन जेष्ठ नागरिक आशिर्वाद लिनु पर्ने उल्लेख गर्दै उहाँहरू जिवित इतिहास भएको बताउनु भयो ।
मङ्गलबार मोरङको उर्लाबारी –९ दुर्गावास टोलमा बलराम, लक्ष्मीदेवी गड्तौला स्मृति प्रतिष्ठानले आयोजना गरेको दौतरी तथा जेष्ठ नागरिक सम्मान कार्यक्रममा बोल्दै उहाँले सो कुरा बताउनु भएको हो । मुख्यमन्त्री कार्कीले जेष्ठ नागरिकको सम्मान र उहाँहरूको वृद्धा अवस्थामा पालन पोषणमा समस्या नहोस भनेर सरकारले भत्ताको ब्यवस्था गरेको उल्लेख गर्नुभयो । उहाँले गड्तौला परिवारले शिक्षा क्षेत्रमा पु¥याएको योगदानको चर्चा गर्दै उहाँहरूकी छोरी देशको मुख्यसचिव बनेको उल्लेख गर्नुभयो । छोराछोरी दुबैलाई समान शिक्षा नदिएको भए पहिलो महिला मुख्यसचिव बन्ने अवसर प्राप्त नहुने उहाँको भनाई थियो । दिगो र स्थायी सरकारका लागि नयाँ गठबन्धन भएको बताउँदै मुख्यमन्त्री कार्कीले अब यो सरकारले पुरै अवधि काम गर्ने उल्लेख गर्नुभयो । कार्यक्रममा ७५ वर्ष माथिका ७६ जना वृद्ध बुबाहरूलाई कुर्ता सुरुवाल वितरण गरिएको थियो । गड्तौलाका दौंतरी १०२ वर्षीय बीरबहादुर पौडेल लगायतलाई मुख्यमन्त्री कार्कीले सम्मान गर्नुभयो ।
प्रतिष्ठानका अध्यक्ष गोपालकृष्ण गड्तौलाको सभापतित्वमा भएको कार्यक्रममा कोशी प्रदेशका सांसद शोभा चेम्जोङ पालुङ्गवा,उर्लाबारी नगरपालिकाका उप प्रमुख मीना पौडेल र समाजसेवी जयधर्म आचार्यले बोल्नु भएको थियो । तत्कालिन राजघाट गाउँ पञ्चायतका उप प्रधानपञ्च एवम् अग्रज समाजसेवी बलराम गड्तौलाको शताब्दिऔं जन्मजयन्तीका अवसरमा कार्यक्रमको आयोजना गरिएको हो ।
कार्यक्रममा कोशी प्रदेशका सांसदहरू उमाकान्त गौतम्,विद्यादेवी चाम्लिङ,मालती सुब्बा र गणेशप्रसाद उप्रेती लगायतको उपस्थिति थियो ।