सुन्दरहरैँचा । मोरङको सुन्दरहरैँचा–१० स्थित सुकुना सामूदायिक वन उपभोक्ता समूह र धन्वन्तरी जडिवुटी उत्पादक सहकारी संस्था लि.ले संयुक्त रुपमा ४ दशमलव ८९ हेक्टर ( झण्डै साडे ७ बिघा) मा वृहत वृक्षरोपण गरेका छन् । सामूदायिक वनको खालि जमीनमा वृक्षरोपण गरिएको हो ।
२०८० को माघ १० गते जडिबुटी सहकारी र सामूदायिक वन बिच २० हेक्टर बनमा वृहत वृक्षरोपण गर्ने सम्झौता भएको थियो । सोही सम्झौता अनुसार वृक्षरोपण गत बैशाख १७ गते सुरु गरी साउन २४ गते समापन गरिएको हो । ‘उत्पादनमा लागांै, आत्मनिर्भर बनांै ’ भन्ने मुल नाराका साथ सुरु भएको वृक्षरोपणमा सहकारी र सामूदायिक वनका शेयर सदस्यहरू समेत सहभागि भएका थिए । पहिलो चरणमा ७ बिघामा बाबरी जातका जडिबुटीका बिरुवा रोपिएको सामूदायिक बनका सचिव मदनप्रसाद आचार्यले बताउनु भयो । जडिबुटी उत्पादन तथा प्रशोधन कम्पनी लिमिटेड तरहरा सुनसरी र बेलबारी शाखाको सहयोगमा जडिवुटीको वृक्षरोपण कार्यक्रम भएको हो । उत्पादित जडिवुटी कम्पनीले खरिद गर्ने भएपछि सामूदायिक वन र सहकारीका सदस्यहरू उत्साहित भएका छन् ।
वर्ष दिन भित्र उत्पादन दिने गरि १० कट्ठा जग्गामा बेसारका बिरुवा रोपिएको छ । सुन्दरहरैँचा १० का वडाध्यक्ष राजकुमार राई, नगरको कृषि शाखा र स्थानीयको समेत सहभागिता रहेको वृक्षरोपण गर्न १४० जनालाई झण्डै चार महिना लागेको थियो ।
२९१ दशमलव ७५ हेक्टर क्षेत्रफल रहेको सामूदायिक वनमा १ हजार २०५ घरधुरी आवद्ध छन् । सामूदायिक वनबाट लाभान्वित जनसङ्ख्या ६ हजार १०७ रहेको छ ।
