उर्लाबारी । वर्षाले पहाडका ग्रामीण सडक भत्केपछि तरकारीको ढुवानी खर्च बढेको भन्दै ब्यापारीले तरकारीको मूल्य जथाभावि बढाएका छन् । आफै तरकारी उत्पादन गरेर बिक्री गर्ने किसानले भने राम्रो मूल्यमा तरकारी बिक्री गर्न पाएका छन् ।
तरकारी बजार ल्याउनु पूर्व बजार भाउ सोधेर मात्र बोरा खोल्ने किसान यति बेला आफ्नो तरकारीको मूल्य आफै निर्धारण गरिरहेको बताउँछन् । मोरङको रतुवामाई –३ महादेवाका तरकारी किसान यमलाल दासले भन्नुभयो –‘२ विगाहा खेतमा लगाएको तरकारीले राम्रो मूल्य पाएको छ । अहिले यमलालको परिवारका सबै सदस्य आफैं गुद्री बजार लगेर तरकारी बिक्री गरिरहनु भएको छ । अरु बेला थोकमा बिक्री गर्थे । साउन १५ यता आफैं बेचिरहेको छु । दासको वारिमा अहिले भिन्डी, बैगुन,बोडी, करेला,लौका र खोर्सानी लगायतका तरकारी छन् ।
दासमा मात्र होइन । पथरीशनिश्चरे ६ केचनाका तरकारी उत्पादक इन्द्रजीत मण्डल पनि आफ्नो उत्पादन आफै बिक्री गर्न बस्नुहुन्छ । भारतबाट तरकारी आउने क्रम अलि कम हुनासाथ हाम्रो उत्पादनले राम्रो मूल्य पाउँछ, उहाँले भन्नुभयो । उहाँको भनाई पनि यमलालको जस्तै छ । इन्द्रजीतले भन्नुभयो –पहिले ठूला ब्यापारीलाई सोधेर आफ्नो तरकारीको मूल्य निर्धारण हुन्थ्यो । अहिले आफ्नो तरकारीको मुल्य आफै तोकेर बेचिरहेका छौं । उहाँले भन्नुभयो –‘ अघिल्लो बजारमा प्रति केजी ५० रुपियाँ बिक्री गरेको भिन्डी मङ्गलबारको हाटमा ८० रुपियाँ केजीले बिक्री भयो ।
रतुवामाई –५ कोइलीडाँगीका मनोज दासले भन्नुभयो – १० कट्ठामा पिडालु लगाएको छु । अघिल्लो साता ८० रुपियाँ किलो बिक्री गरेको पिडालु मङ्गलबार १०० किलो बिक्री भयो । उहाँले पिडालुसँगै झिगनी,घिरौला लगायतका तरकारी लगाउनु भएको छ । यही मूल्यमा तरकारी बिक्री गर्न पाए १० कट्ठाबाट १ लाख ५० हजारको तरकारी बिक्री हुने दासले बताउनु भयो ।
सामान्यता पूर्वमा साउन तेस्रो साता देखि भदौभर तरकारीको मुल्य उच्च हुने गर्छ । तर, पहाडमा ग्रामीण सडक सञ्जाल नबिग्रीदा तरकारीको मूल्य खासै नबढ्ने तरकारी ब्यापारीहरू बताउँछन् । साउन २० गते सम्म प्रति केजी ५०÷५५ रुपियाँँ खुद्रा मुल्यमा पाइने टमाटरको मुल्य केजीको १२० पुगेको छ । ४० रुपियाँँ केजीको भिन्डीको मुल्य ८० रुपियाँँ पुगेको छ। यस्तै ६० रुपियाँ प्रति केजीको प्याज १ सय रुपियाँँ पुगेको छ ।
यस्तै लसुन ४ सय रुपियाँ किलो पुगेको छ । लसुन साता अघि २५० रुपियाँ देखि ३००मा बिक्री हुँदै आएको ब्यापारी अनुप साहले बताउनु भयो । आलुको मुल्य समेत किलो मै ४० रुपियाँ बढेको छ । साउन तेस्रो साता ४० रुपियाँ किलोको नयाँ पहाडे नेपाली आलु मङ्गलबार ८० रुपियाँमा बिक्री भएको थोक बिक्रेता रमेश साहले बताउनु भयो । बजारको सबैभन्दा सस्तो मूल्यको तरकारी स्कुसको मूल्य भने घटेको छ । ६० रुपियाँ प्रति किलोमा बिक्री भएको स्कुल मङ्गलबार ४० रुपियाँमा बिक्री भयो । त्यति मात्र होइन,जङ्गलबाट टिपेर ल्याएको निगुरो समेत ५० रुपियाँ मुठामा बिक्री भयो । साउन तेस्रोसाता निगुरो ३० रुपियाँ मुठामा बिक्री भएको थियो ।
इलाम,पाँचथर र धनकुटाबाट आउने काँक्रा,डल्लेखोर्सानी,मुला, तामाको मेसोको मुल्य समेत झण्डै दोब्बर बढेको उर्लाबारीका थोक तरकारी ब्यापारी गजेन्द्र अधिकारी बताउनु भयो । अधिकारीका अनुसार पहाडी कृषि सडक बाढीले भत्काएपछि किसानको बारी सम्म गाडी पुग्न छोडेको छ । स्थानीय महंगा कृषि मजदुरलाई बोकाएर गाडी सम्म तरकारी ल्याउँदा मुल्य बढेको अधिकारीको भनाई छ ।