उर्लाबारी, १२ कात्तिक । संविधानसभा सदस्य नगेन्द्रबहादुर धिमालले परिवर्तनका पक्षधरहरूले संविधान जोगाउनु पर्ने बताउनु भएको छ ।आइतबार मोरङको उर्लाबारी–३ मंगलबारे स्थित धिमाल जातीय विकास समितिको सभाहलमा भएको धिमाल मुक्तिमोर्चाको कार्यक्रममा बोल्दै उहाँले सो कुरा बताउनु भएको हो । उहाँले सोझो जाति धिमाललाई राज्यले प्रयोग मात्र गरेको बताउँदै अधिकार स्थापनाका लागि आवश्यक परेको बेला धिमालले साथ दिइरहेको बताउनु भयो ।
कोचिला राष्ट्रिय मुक्तिमोर्चाका केन्द्रीय अध्यक्ष एवम् माओवादी केन्द्रका केन्द्रीय सदस्य ममता राजवंशीले प्रचण्डले बाहेक कसैले पनि जातीय मुक्तिको अधिकार स्थापना गर्न नसक्ने बताउनुभयो । स्वायत्त क्षेत्र कायम नभए सम्म आन्दोलन नरोकिने उहाँको भनाइ थियोे । उहाँले पार्टीको रुपान्तरण अभियानले पार्टीलाई पुरानो उचाईमा पुर्याउनु पर्नेमा जोडदिनुभयो ।नेकपा माओवादी केन्द्र कोशी प्रदेश सचिवालय सदस्य एवम् संयुक्त जातीय मोर्चा कोशी प्रदेशका अध्यक्ष प्रेम मिभकले संघीयता ठुलो देश र सानो देश हुँदैमा आवश्यक पर्ने वा नपर्ने बताउनुभयो । बहुजातीय समाजमा संघीयता आवश्यक पर्ने बताउँदै उहाँले नाक मुखका कुरा नगरी राज्यले भाषिक ,सांस्कृतिक विषयमा राजनीतिक संरक्षण गर्नुपर्नेमा जोडदिनुभयो । सत्ता चरित्रको गतिविधि गर्न आग्रह गर्दै मिभकले धिमालका कुरा अब प्रचण्डले नलेखिदिने भएकोले धिमालका बिषय धिमालले नै उठाउनु पर्नेमा उल्लेख गर्नुभयो । उहाँले कोशी नाम पनि पहिचान नै भए पनि यो नामले कमजोरहरूको भाष्यलाई सम्वोधन नगरेकोले आन्दोलन भइरहेको बताउनुभयो ।
रतन धिमालले स्वागतभाषण गर्दै हिजो पार्टीमा भएका तर अहिले पार्र्टी छोडेकाहरूलाई पुन पार्र्टीमा फर्काउने दायित्व नेता कार्यकर्तामा आइलागेको बताउनुभयो ।
मोर्चाको वर्तमान अवस्था बारेमा प्रकाश पार्दै प्रकाश धिमालले धिमालहरू आर्थिक ,सामाजिक,शैक्षिक र सांस्कृतिक रुपमा कमजोर रहेको उल्लेख गर्नुभयो । नेकपा माओवादी केन्द्रले जातीय उत्थानका लागि उठाएका सवालहरू अझै नटुङ्गिएको बताउँदै उहाँले धिमाल स्वायत्त क्षेत्र कहिले बन्छ भनेर प्रश्न गर्नुभयो । बोलाएका नेताहरू नआएको प्रति गुनासो गर्दै उहाँले पार्टीले धिमाल समुदाय प्रति वेवास्ता गरेको आरोप लगाउनु भया । धिमाल स्वायत क्षेत्रको मुद्दा ओझेलमा परेको बताउँदै उहाँले धिमाल संग्रहालय निर्माण गर्नुपर्नेमा जोडदिनु भयो । विनोद धिमालले पार्टी पटकपटक सरकारमा गएपनि धिमाल समूदायको उत्थानका लागि कुनै प्रकारका काम गर्न नसकेको गुनासो गर्नुभयो । उहाँले माओवादी एमालेसँग मिसिएपछि पार्टी कमजोर भएको बताउनुभयो । धिमाल राष्ट्रिय मुक्तिमोर्चा नेपालका अध्यक्ष गणेशमान धिमालको अध्यक्षतामा भएको कार्यक्रममा ,किराँती राष्ट्रिय मुक्तिमोर्चाका महासचिव अर्जुन जम्नेली, आदिवासी जनजाति संयुक्त मोर्चाका सचिवालय सदस्य खगेन्द्र धिमाल लगायतले बोल्नु भएको थियोे ।
