पथरीशनिश्चरे । गाउँघरमा आधुनिक मनोरञ्जन साधनको पहुँच नभएको समयमा बालन र सङ्गीनीको हाई हाई थियो । मान्छे टाढ टाढाबाट बालन र सङ्गीनी हेर्न कार्यक्रम स्थलसम्म पुग्थे । तर, त्यही बालन र सङ्गीनी अहिले एकदेशको कथामा मात्र सुन्ने गरिन्छ ।
शनिबार मोरङको पथरीशनिश्चरे ३ मा स्थानीय जागरुक महिला समूहले युवा पुस्तामा सङ्गीनीको परिचय गराउन प्रतियोगितात्मक भजन प्रतियोगिता र सङ्गीनीको प्रदर्शनी गरेका छन् । बालबालिका, युवा र बुढापाका नरनारीको उल्लेख्य उपस्थिति रहेको कार्यक्रममा वडाका १२ वटा किर्तन समूहले भजन प्रस्तुत गरेका थिए भने महिलाहरूले सङ्गीनी नाँचको प्रदर्शनी गरेका थिए ।
सङ्गीनीमा बुढापाकाको आकर्षण थियो भने भजन कीर्तनमा युवा पूस्ता र बालबालिकाले साथ दिएका थिए । विगतमा घरधन्दा र मेला पातका गीत गाएर सङ्गीनी नाँच्ने गरिन्थ्यो ।अहिले समाजमा भएको महिला हिंसा विरुद्ध लाग्न र अधिकार स्थापित गर्न आफ्नै गाउँबाट सुरु गर्नुपर्छ भन्दै सङ्गीनी गाउँदै नाँच्दा सहभागिहरू छमछम नाँचेका थिए ।
गाउँघरमा कुनै शुभकार्य हुँदा नाचिने ‘बालन नाच’र सङ्गीनी गुमनाम भयो , त्यसैले अभियान सुरु गरेका हौं, स्थानीय जागरुक महिला समूहकी अगुवा रेणुका काफ्लेले बताउनु भयो । खासगरी बाहुन क्षेत्री समूदायमा नाचिने बालन पश्चिमा संस्कृतिको प्रभाव बढेसँगै समाजमा हराउँदै गएको हो । जुनसुकै शुभकार्यमा बालन नाचिने गरिन्थ्यो ।झण्डै डेढ दशक अघिसम्म गाउँघरमा बालन नाँचेको स्मरण गर्दै स्थानीय भूवनेश्वर पोख्रेलले भन्नुभयो– वालन नाच लोप हुन लाग्यो । त्यसैले संस्कृतिको जगेर्नाका लागि हामीले सङ्गीनी र बालनलाई सँग सँगै ब्युताउन कार्यक्रम गरिरहेका छौं ।
महिला जागरुक हरिकीर्तन तथा सङ्गीनी समुहले आयोजना गरेको कार्यक्रममा पथरीशनिश्चरे नगरपालिकाका उपप्रमुख देवीमाया काफ्लेले नगरमै पहिलो पटक आयोजना भएको कार्यक्रमले सबैलाई एकतामा जोड्न सहयोग पु¥याउने बताउनु भयो ।
आफ्नो मौलिकता र संस्कृति जोगाउने उद्देश्यले गरिने यस्ता कार्यक्रमलाई स्थानीय सरकारले सहयोग गर्ने उप प्रमुख काफ्लेले बताउनु भयो । कार्यक्रममा वडाध्यक्ष विजय लिम्बू , नगरका प्रबक्ता नवीनजङ्ग कार्की र वडा नम्वर ४ का वडाध्यक्ष लोककिरण न्यौपानेले भजन कीर्तनले समूदायलाई जोड्ने बताउनु भयो । भजन गायन प्रतियोगितामा दीर्घायु हरि कीर्तन मण्डली प्रथम , पशुपति हरिकिर्तन मण्डली दोस्रो, ज्ञानकुञ्ज हरि कीर्तन मण्डली तेस्रो र सिद्धेश्वर हरिकिर्तन मण्डली सान्त्वना घोषित भए ।
