कानेपोखरी ,२८ असोज । नेपाल लोकतान्त्रिक आदिवासी जनजाति महासङ्घ कानेपोखरीको आयोजनामा बडादशै , शुभ दिपावलि तथा छठ पर्वको शुभकामना आदान प्रदान कार्यक्रम सम्पन्न भएको छ । रमाइलो जनएकता साकोस रमाइलोको सभाहलमा कार्यक्रम भएको हो ।
कार्यक्रमलाई सम्बोधन गर्दै कार्यक्रमका प्रमुख अतिथि नेपाली कांग्रेस कोशी प्रदेश सदस्य सन्जय भट्टराईले नेपालमा आदिवासी जनजातिका समस्या प्रति सरकार कहिल्यै सकारात्मक नभएको बताउनुभयो । उहाँले युवाहरुलाई देशमै रोजगारीको व्यवस्था गर्न सरकारले नसक्दा लाखौं युवा बिदेशी रहेको बताउँदै सरकारले रोजगार सिर्जना गर्न नसके देश अशक्त र वृद्धको मात्र रहने उल्लेख गर्नुभयो । अर्का वक्ता कोशी प्रदेशका पूर्व सांसद एवम् कांग्रेस महासमिति सदस्य सुयर्माराज राईले पार्टी भित्र हार्दिकताको वातावरण हराउँदै गएको बताउनु भयो ।
अर्का वक्ता संविधान सभा सदस्य विश्वदिप लिङ्देनले देशलाई शोषण मुक्त बनाउनका लागि आदिवासी जनजातिको महत्वपूर्ण योगदान रहेको बताउनु भयो । लोकतान्त्रिक आदिबासी जनजाति महासंघका कोशी प्रदेश अध्यक्ष समेत रहनु भएका लिङ्देनले आदिबासी जनजातिलाई भोट बैंकको रुपमा मात्र प्रयोग गरिरहे बिद्रोह हुने बताउनु भयो ।
नेपाल लोकतान्त्रिक आदिवासी जनजाती महासंघ कानेपोखरीका अध्यक्ष नरबहादुर राईको सभापतित्वमा भएको कार्यक्रममा नेपाली काङ्ग्रेस मोरङका पूर्व जिल्ला सदस्य सुशील राईले पनि बोल्नु भएको थियो । कार्यक्रम गाउँसमितिका सह सचिव शुक्र लिम्बूले सञ्चालन गर्नु भएको थियो । दीपेश राेक्काबाट