उर्लाबारी, २४ भदौ । निरन्तर कर्म गरे सफलता प्राप्त गर्न सकिन्छ भन्ने उदाहरण बन्नु भएको छ, मोरङको उर्लाबारी–५ का नरकाजी श्रेष्ठ ।
१९ वर्ष अघि खोटाङको दुर्गम गाउँ दोर्पाबाट पैसा कमाउन बैदेशिक रोजगारका लागि दुवई पुग्नु भएका श्रेष्ठले २ वर्ष त्यही कठोर श्रम गर्नुभयो । उद्योग राम्रो प¥यो । काम पनि ठिकै थियो । २ वर्षपछि नेपाल फर्केर उहाँ पुन साउदीअरव जानुभयो । साउदीको कृषि फर्म काम गर्नु भएका श्रेष्ठले नेपाल फर्केर बिदेशको सीप नेपालमा प्रयोग गर्न थाल्नु भयो । उहाँले उर्लाबारी–१ को झारसाँदीका २ बिघा जग्गा खरिद गरेर गाईपालन सुरु गर्नुभयो ।आधुनिक गोठ बनाएर दूधालु भित्राउनु भयो । २ वर्षमा गोठ रमिता लाग्दो बन्यो । तर दूधले बजार पाएन । प्रसोधन उद्योग सञ्चालन गर्ने क्षमता श्रेष्ठमा थिएन । ३ वर्षको बीचमा ६ वटा गाई गाड्नु प¥यो । श्रेष्ठ भन्नुहुन्छ–एकपछि अर्को गाई मरेपछि ब्यवसायबाट विस्थापित हुनुप¥यो ।
पैसा स्थायी सम्पत्तिमा लगानी भएको थियो । चल पुँजी गाई मरेसँगै सकियो । बीमाबाट प्राप्त केही रकममा ऋणपान गरी उहाँले पानी उद्योग सञ्चालन गर्न थाल्नुभयो । सामान्य पढेलेखेको ब्यक्ति न हिसाव राख्ने क्षमता थियो, न कुनै प्राविधिक ज्ञान ।४ वर्षसम्म पानीका जार अफिस र घरका चार पाँच तल्लासम्म बोक्दा बोक्दै उद्योग बन्द गर्नुपर्ने अवस्था आयो । उहाँ भन्नुहन्छ– पानी उद्योग डुबेपछि बजारमा उठ्न बाँकी रकम उठाएर सुन ब्यापार सुरु गरें । आफैसँग भएका गर गहना र थोरै ऋण लिएर सुरु गरेको सुन ब्यापार कोरोनासँगै उठ्नै नसक्ने गरि गलियो । सुन ब्यापार डुबेपछि न साथी भाइ रहे न,आफन्तजन ।
त्यसपछि उहाँले सिलाई ब्यवसाय सुरु गर्नु भएको हो । २ वर्ष अघि सुन ब्यापार छोडेर सिलाई ब्यवसाय थाल्नु भएका श्रेष्ठ भर्खर तङ्ग्रिन थाल्नु भएको छ । विभिन्न जातीय पोशाक सिलाउने र बजारीकरण गर्ने उहाँको मुख्य काम हो । ५ जना कामदार राखेर दैनिक १८ घण्टा आफैं काम गरिरहनु भएका श्रेष्ठ भन्नुहुन्छ–बजारको माग धान्न सकेको छैन। मौसम अनुसार आवश्यक पर्ने जातीय पोशाक मात्र होइन । उहाँको गार्मेन्टले विद्यालय, सरकारी तथा गैर सरकारी संस्था, वित्तीय संघ संस्थाका ‘टिसर्ट’ र ‘युनिफर्म’ पनि तयार गर्छ । आफ्नै घर मुनि सो रुम र कारखाना राख्नु भएका श्रेष्ठले भन्नुभयो –अझै टाउको उठाएर हिड्न सक्न अवस्था बनेको छैन् । तर, सिलाई ब्यवसायले विगतको पीडा बिर्साएको छ । हाल ३५ लाख रुपियाँ लगानी गरिसक्नु भएका श्रेष्ठ भन्नुहुन्छ –सिलाई ब्यवसायबाट भारतीय कामदारले करोडौं रुपियाँ लाँदा रहेछन् । त्यो रकम मात्र रोक्न सके, ठूलो उपलब्धि हुने रहेछ । आफूले समेत नेपाली कारीगढ नपाएकोले भारतीय जनशक्ति नै प्रयोग गरिरहेको उहाँको भनाई छ ।