उर्लाबारी । पूर्वपश्चिम राजमार्गको काकरभिट्टा –लौकही सडक खण्ड स्तरोन्नतिका लागि सडक किनारमा रहेका रुख काट्ने प्रक्रिया सुरु भएको छ । सडक क्षेत्रमा पर्ने पुल निर्माणको काम प्रारम्भ भएको छ । भने बजार क्षेत्रको साइड क्लियर गर्ने काम भइरहेको छ ।
डिभिजन बन कार्यालय मोरङका बन अधिकृत घनश्याम यादवका अनुसार मोरङ खण्डको ३६.२ किलोमिटर क्षेत्रमा ५ हजार ५५६ वटा रुख पर्छन् । मोरङ खण्डका मङ्गलबारे,पथरी,कानेपोखरी,बेलबारी र सलकपुर सव डिभिजन बन कार्यालयले सडक क्षेत्रमा पर्ने रुखको धमाधम छपान गरिरहेको यादवले बताउनु भयो । पाँच वटै सव डिभिजन बन कार्यालयबाट ४÷५ जना जनशक्ति परिचालन गरी रुख छपान गर्ने काम भइरहेको छ । केही रुख यसअघि लडिसकेका छन् ,भने केही थपिन सक्छन् ,यादवले भन्नुभयो । ठूलो परिणाममा रुख काट्नु पर्ने भएकोले टेण्डरबाट नै रुख कटान हुने उहाँको भनाई छ । राष्ट्रिय प्राथमिकताको आयोजना भएकोले कुनै बाधा बिरोध काम अघि बढ्ने यादवले बताउनु भयो ।
सुरुमा काकरभिट्टा देखि लौकहीसम्मको १२० किलोमिटर सडक स्तरोन्नति हुने भनिएपनि हाल ९७ दशमलव ७७०किलोमिटर सडक मात्र ठेक्का लागेको छ । सडक दुई खण्डमा ठेक्का लागेको छ । काकरभिट्टा देखि दमक सम्मको ४५ किलोमिटर सडक दमक कार्यालयले हेर्नेछ भने दमकबाट इटहरी पश्चिम सम्मको सडक इटहरी कार्यालयले हेर्नेछ ।काकरभिट्टा–लौकही सडक आयोजना इटहरी कार्यालयका प्रमुख जगत प्रजापतिले भन्नुभयो –सडक र पुल निर्माणका लागि ५ वटा अलग –अलग ठेक्का लगाएको छ । ठूला पुल निर्माणका लागि, साना पुल निर्माणका लागि बेग्ला बेग्लै ठेक्का लागेको छ भने ० देखि ४५ किमीसम्म,४५ देखि ८५ किमीसम्म र ८५ देखि ९७ दशमलव ७७० किमीसम्म ५ वटा ठेक्का लागेको छ । निन्दा, विरिङ, कन्काई पुल निर्माणका लागि एउटा , रतुवा, बक्राहा र लोहन्द्रा पुल निर्माणको अर्को लागेको छ ।यि ६ वटापुल ३ सय मिटर भन्दा लामा छन् । काम छिटो सम्पन्न गर्न अलग अलग टेण्डर आह्वान भएको प्रजापतिले बताउनु भयो ।
जगत प्रजापतिका अनुसार सडक निर्माणका क्रममा जग्गा प्राप्ति गर्नु पर्ने अवस्था छैन् । यद्यपि सडक क्षेत्रमा रहेका ४०४ वटा संरचना हटाउनु पर्नेछ । यस्तै मानिसले साना तिना बरण्डा निकालेका ४५ वटा घरको बरण्डा हटाइने छ । प्रजापतिले भन्नुभयो– यति ठूलो आयोजनामा यो क्षति अत्यन्तै सानो हो । शहरी क्षेत्रमा साइकल लेन, फुटपाथ, ड्रेनसहित निर्माण हुने यस सडक एकैपटक काम सुरु हुनेछ । ३०० मिटरभन्दा लामो पुल रहेको ६ स्थानमा सिग्नेचर पुल निर्माण हुनेछन् । तीन प्रकारको डिजाइन गरिएको सडक ग्रामीण र जङ्गल भएको क्षेत्रमा २४ मिटर, अर्धसहरी क्षेत्रमा ३३ मिटर र सहरी क्षेत्र तथा मुख्यबजार क्षेत्रमा ५० मिटर चौडाइको हुनेछ । आयोजनाले काँकडभिट्टा, इँटाभट्टा, चारआली, बिर्तामोड, दमक, झुम्का, विराटचोक, इटहरीलगायत नौ घनाबस्ती भएको स्थानमा आकाशे पुल र जङ्गल क्षेत्रमा‘अन्डर पास’ निर्माण गर्नेछ ।

नेपालको कालिका र तुङ्गी कन्ट्रक्सनसँग चाइनिज कम्पनीले जोइन्डमा गर्ने सडक निर्माणको कामका लागि धमाधम साइड खाली गर्ने काम भइरहेको आयोजनाका दमक कार्यालय प्रमुख सुनीलबाबु पन्तले बताउनु भयो । पन्तका अनुसार सडक शहरी क्षेत्रमा ६ लेनको र ग्रामीण र जङ्गल क्षेत्रमा ४ लेनको हुनेछ ।
एसियाली विकास बैंकले स्तरोन्नति गर्न लागेको यो सडकको लागत करिब २८ अर्ब १७ करोड रुपियाँ रहेको छ । ३ वर्षमा निर्माणकार्य सम्पन्न गर्ने योजना रहेको यो सडक ‘एसियन हाइवे स्ट्यान्डर्ड’को बन्नेछ । ९७.७७० किलोमिटर मध्ये मोरङमा ३६.२ किलोमिटर सडक मोरङमा पर्छ भने झापामा ५६ किमी सडक पर्छ । सुनसरीमा झण्डै १० किलोमिटर सडक मात्र स्तरोन्नति हुनेछ ।