इटहरी,२५भदौ । इटहरी उपमहानगरले आजदेखि निःशुल्क शव वाहन र एम्बुलेन्स सेवा सुरु गरेको छ । इटहरीको जनतालाई निःशुल्क रूपमा सेवा दिने उद्देश्यले इटहरी क्षेत्र भर निःशुल्क रूपमा सेवा सुरू गरिएकोे नगर प्रमुख हेमकर्ण पौडेलले बताउनु भयो ।
उहाँले इटहरी अस्पतालमा सोमबारदेखि लागू हुने गरी निःशुल्क एम्बुलेन्स र शव वाहन सेवा सुरु गरिएको बताउनु भयो ।इटहरी उप महानगरपालिकाले आफ्ना नगरवासीका लागि घरदेखि घाटसम्म शव वहान र घरदेखि इटहरी अस्पतालसम्म निःशुल्क एम्बुलेन्स सेवा सञ्चालनमा ल्याएको नगर प्रमुख पौडेलको भनाइ छ ।
नगर प्रमुख पौडेलले आफू निर्वाचित भएदेखि नै इटहरी अस्पताल बनाउन दिन रात खटेको बताउँदै एक वर्ष भित्रमा इटहरी अस्पतालमा व्यापक सुधार गर्ने बताउनु भयो । ‘मेरो उद्देश्य इटहरीको जनता उपचारको लागि धरान इटहरी जानु नपरोस् भन्ने हो,’ प्रमुख पौडेलले भन्नुभयो । पछिल्लो समय अस्पतालमा बिरामीको चाप अत्यधिक बढेको भन्दै एम्बुलेन्स र शव वहानको अभाव सुरु भएको कारण जनतालाई निःशुल्क रूपमा उपलब्ध गराउने निर्णय गरेको प्रमुख पौडेलले बताउनु भयो । इटहरी अस्पतालमा विशेषज्ञ डाक्टरहरूको सुविधा थपिएसँगै बिरामीको चाप बढेको छ ।