रतुवामाई,२७ असोज । मोरङको रतुवामाई ७ सिजुवाका मानबहादुर देवानले आफ्ना दिङ्गत बुबाआमाको सम्झनामा हुन लागेको पञ्चतिलक स्मृति फुटबल प्रतियोगिताको सम्पूर्ण खर्च ब्यवस्थापन गर्ने हुनु भएको छ ।
रतुवामाई फुटबल युनाइटेडले कात्तिक १ गते देखि अन्तर वडा स्तरीय प्रथम पञ्चतिलक स्मृति कप फुटबल प्रतियोगिता आयोजना गर्न लागेको छ । सिजुवामा पत्रकार सम्मेलन गर्दै आयोजक रतुवामाई फुटबल युनाइटेडका महासचिव शुलभ बस्नेतले प्रतियोगिता आयोजन गर्न लाग्ने अनुमानित ७ लाख ५० हजार रुपियाँ देवानले ब्योहोर्ने बताउनु भयो । आमा पञ्चमाया र बुबा तिलकसिंह देवानको नाम रहन्छ भनेर लागत खर्च ब्योहोर्न लागेको रामबहादुर देवानले बताउनु भयो ।
नगका १० वटा वडाले भाग लिने प्रतियोगिता प्रस्तावित रतुवामाई रङ्गशाला(गढीझार खेलमैदान)मा हुनेछ । प्रतियोगिताको विजयी टिमले ५० हजार नगद र ट्रफि , प्रमाणपत्र पाउने छ । यस्तै उप विजयी टिमले ३० हजार नगद र ट्रफि प्माणपत्र पाउने छ । प्रतियोगितामा ७ विधामा विभिन्न ट्रफि र नगद ३ हजार पुरस्कार प्रदान गरिनेछ ।
रतुवामाई नगरपालिकाले ४ वर्षयता कुनै प्रतियोगिता आयोजना नगरेको महासचिव बस्नेतले बताउनु भयो । नगरमा खेलकुद समिति समेत गठन हुन सकेको छैन । त्यसैले हामीले प्रतियोगिता आयोजना गर्न जिल्ला फुटबल सङ्घ मोरङसँग प्राविधिक सहयोग मागेका छौं ।
प्रतियोगिताको उद्घाटन नगर प्रमुख नागेश्वरप्रसाद सिंहले गर्नु हुनेछ भने दशैंको नवमीको दिन युवा तथा खेलकुद मन्त्री डिगबहादुर लिम्बूले प्रतियोगिताका विजयी टोलिलाई पुरस्कार तथा ट्रफि प्रदान गर्नुहुनेछ ।