मोरङ । हाल वडा नं.६ को रमाइलोमा रहेको मोरङको कानेपोखरी गाउँपालिकाको प्रशासनिक भवन वडा नं. ५ को भौंसावारीमा सारिने भएको छ । कोशी प्रदेश सरकार मन्त्रिपरिषदको बैठकले माघ २९ सोमबार सङ्घीय सरकार समक्ष प्रशासनिक भवन सार्न सिफारिस गरेसँगै प्रशासनिक भवन सार्ने प्रक्रिया सुरु भएको हो ।
२०८० को बैशाख १७ गते भएको १२ औं गाउँसभामा भएको मतदानमा गाउँ सभामा भएका ३९ सदस्य मध्ये २७ जनाले प्रशासनिक भवन भौंसावारीमा सार्ने पक्षमा मतदान गर्नु भएको थियो । यथास्थानमा राख्नु पर्छ भन्ने पक्षमा ७ जना र ४ जनाको मत बदर भएको थियो । त्यसपछि यथास्थान मै प्रशासनिक भवन रहनु पर्ने माग राखी स्थानीय केहीले प्रक्रिया नपु¥याई प्रशासनिक भवन सार्ने निर्णय गरेको भन्दै उच्च अदालत विराटनगरमा मुद्धा दायर गरेका थिए । उच्च अदालतले गाउँपालिकालाई तत्काल कुनै काम अघि नबढाउनु भन्दै अन्तरिम आदेश जारी गरेको थियो । अदालतको आदेश पछि ९ महिना रोकिएको प्रशासनिक भवन सार्ने कार्य गत पुस १६ गते उच्च अदालत विराटनगरले माग दाबी नपुगेको भन्दै गाउँपालिकाको पक्षमा फैसला गरेपछि अघि बढेको हो । गाउँपालिकाका प्रवक्ता सुशील बुढाथोकीले भन्नुभयो – स्थानीय सरकार सञ्चालन ऐन अनुसार बहुमतले गरेको निर्णयमा अदालत धाइ रहनु पर्ने अवस्था नै थिएन् । तर, कानूनी शासन मान्ने स्थानीय सरकारले अदालतको सम्पूर्ण प्रक्रिया पर्खेर माघ २१ गते कोशी प्रदेश सरकारलाई सिफारिसका लागि पत्राचार गरेको हो । बुढाथोकीका अनुसार पालिकाको माघ अनुसार नै प्रदेश सरकारले सङ्घीय सरकारलाई प्रशासनिक भवन सार्न मार्गप्रसस्त गरिदिएको हो ।
कानेपोखरी गाउँपालिकाका अध्यक्ष राजमति इङ्नामले गाउँपालिकाको गाउँसभाका बहुमत सदस्यले गरेको निर्णय कार्यान्वयन गर्नु हाम्रो कर्तब्य भएकोले सोही अनुसार प्रक्रिया अघि बढेको बताउनु भयो । इङ्नामले गाउँपालिकाले प्रशासनिक भवन बनाउन जग्गा खरिद गरिसकेपछि उक्त जग्गामा प्रशासनिक भवन बनाउनु निर्वाचित जनप्रतिनिधिको दायित्व भएको बताउनु भयो । अब स्रोतको सुनिश्चितता गरेर प्रशासनिक भवन निर्माण सुरु हुन्छ, उहाँले भन्नुभयो ।
राज्य पुनर्संरचनापछि साविकका बयरवन, केरौन र होक्लाबारी गाविसलाई समायोजन गरी कानेपोखरी गाउँपालिका बनेको थियो । राज्य पुनर्संरचना आयोगले पालिकाको केन्द्र बयरवन गाविसको कार्यालयमा राख्ने निर्णय गरेको थियो । तर, पालिकाको नयाँ भवन निर्माण गर्ने जग्गा अभाव भएपछि गाउँपालिकाले वडा नं.५ को भौंसावारीमा १ विघा ५ कट्ठा जग्गा खरिद गरेको थियो ।
